Gin-anunsyo sang Civil Aeronautics Board (CAB) nga liwat nila nga buhinan ang fuel surcharge para sa domestic kag international flights humalin Hunyo 1 tubtub 15 bangud sa padayon nga pagnubo sang presyo sang jet fuel sa pangkalibutanon nga merkado.
Gikan sa subong nga Level 15, ginpanubo na ini sang CAB sa Level 13. Bangud sini, mangin manubo ang surcharge para sa mga pasahero nga nagabyahe sa sulod kag gwa sang pungsod.
Sa idalum sang Level 13, ang fuel surcharge para sa domestic flights magalab-ot na sa P423 tubtub P1,237, mas manubo sang sa nauna nga P491 tubtub P1,436.
Samtang para naman sa international flights, magalab-ot sa P1,396 tubtub masobra P10,385 ang surcharge depende sa kalayuon sang byahe, mas manubo man sa nauna nga charge nga masobra P12,000.
Nagpahanumdom man ang ahensya nga separado ang fuel surcharge sa base airfare kag mahimo ipatuman sang mga airlines depende sa ila polisa.
