Naglab-ot na sa 120 ka tawo, kalabanan sa ila mga pulis ang napilasan matapos ang engkwentro sa tunga sang mga otoridad kag mga protesters sa Mexico.
Linibo man ka mga tawo ang nagmartsa sa Mexico City kag pila pa ka mga lugar sa pungsod agud pakamalauton ang nagapadayon nga mga krimen kag pamatukan ang pagpanguna ni President Claudia Sheinbaum.
Suno kay Sheinbaum, ang mga naghimo sang mga hublag-protesta ang ginpondohan sang mga right-wing politicians nga nagapamatok sa iya liderato.
Nahibaluan ang hublag-protesta ang gin-organisar sang Gen Z youth groups nga ginasuportahan sang pila ka mga pumuluyo nga nagapamatuk sa mga high-profile killings lakip na ang assassination.
Gintuyo sang grupo nga salakayon ang National Palace sa diin nagapuyo si Sheinbaum apang ginpunggan sang mga otoridad, nga nagresulta sang kinagamo.
Nagpanawagan naman si President Claudia Sheinbaum sang malinong nga paghambalanay kag nagpasalig nga indi nila pagtugutan nga magluntad ang kinagamo.
