ROXAS CITY, CAPIZ – Yara sa 146,337 learners sa mga Child Development Centers sa Western Visayas ang magabenepisyo sa ginpalapad nga supplementary feeding program sang Department of Social Welfare and Development (DSWD) nga magasugod sa bulan sang Hulyo.
Sa interview sang Bombo Radyo Roxas kay Maria Noema Castromayor, Focal Person sang Supplementary Feeding Program sang DSWD Region 6, ginpahayag sini nga nagaisahanon lamang ang Western Visayas sa bug-os nga pungsod kun sa diin ang tanan nga masobra 5,000 child development centers ang aktibo nga magapasakop sa programa sang gobyerno.
Suno pa kay Castromayor, kabahin sang programa ang pagsukat sang bug-at kag kataason sang mga bata sa umpisa kag pagkatapos sang feeding program, kag padayon ini nga i-monitor sa bug-os nga tion sang paghatag sang pagkaon.
Kaupod man ang mga ginikanan sang mga bata sa pagpreparar sang pagkaon, gamit ang mga masustansya, barato, kag mga panakot gikan sa lokal nga komunidad.
Tuigan nga ginapatuman ang nasambit nga programa halin sang ini ang mapasalayi sadtong 2018 sa idalom sang Republic Act No. 11037 ukon ang “Masustansiyang Pagkain Para sa Batang Pilipino Act.”
Tinutuyo sang programa nga batuan ang malnutrisyon kag siguruhon nga handa nga makatuon ang mga bata pinaagi sa tama nga nutrisyon.
– Interviewed by Bombo Lynd-C Bade
