PANITAN CAPIZ – Nataban sang wala makilan-an nga kawatan ang masobra 20 nga mga manok sa Barangay Timpas, Panitan Capiz.
Sa interview sang Bombo Radyo kay Punong Barangay Teody Degones Sr. sang Barangay Timpas, ginpahayag sini nga una nga nareport nga ginkawatan amu ang mismo niya nga tiyo kun sa diin masobra 20 nga mga hinuptanan nga manok ang natigayon nga mataban.
Ika-duha ang farm sang isa sa mga pumuluyo sini kun sa diin natigayon nga makuha ang 2 ka mga inugbulang nga manok.
Suno kay PB Degones, apisar nga may Closed-circuit television (CCTV) ang nasambit nga farm natigayon sa gihapon ini nga masulod.
Indi man suno diri makumpirmar kung ang kawatan tumandok ukon pangayaw sa lugar bangud kung basehan suno diri nga daw kaangay kabisado na sini ang lugar rason nga nahibaluan sini kung sa diin ang may cctv kag wala.
Bangud sini, gilayon nga ginmanduan ni Degones ang iya mga barangay official partikular ang mga Barangay Tanod nga magroving sa mga lugar kung sa diin posible ginapwestuhan sang mga kawatan.
Mensahe sini sa mga pumuluyo sa lugar nga mangin segurista kag mag-andam sa tanan nga oras.
