Ginhatagan sang presidential clemency ni US President Joe Biden ang 2,500 inmates.
Pero ini ang mga convicted lamang sang non-violent drug crimes.
Ginhimo ini sang presidente sang America, pila ka adlaw antes pa man magtapos ang iya termino sa White House.
Suno kay Biden, ang nasambit nga mga indibidwal ang nagaserbe na sang malawig nga sentensya ikumparar sa mga hatol nga ginpataw sa mga nagkasala sa karon sa idalom sang layi.
Kaangut sini, gingawad ni Biden ang pardon kag ginpanubo ang sentensya kun sa diin siya ang tanging presidente sang Amerika nga naghimo sang nasambit nga butang.
Nahibaluan nga sang Disyembre 2024, ginbabaan man ni Biden sang sentensya ang yara sa 37 sa 40 federal inmates nga nagapangatubang sa death penalty.
Ginhimo na lang ini nga life imprisonment without parole.
Gin-anunsyo man sini sa kapareho nga bulan ang paghatag sang pardon sa 39 nga convicted sang nonviolent crimes kag ginbabaan ang sentensya sang halos 1,500 nga iba pa nga nagserbe sang mas malawig nga tuig sa presohan.
Una na nga ginpuna sang pila si Biden matapos hatagan sang pardon ang bata sini nga si Hunter nga guilty sa tax violations kag na-convict sa firearms-related charges. Samtang, tunga naman ang reaksyon diri sang mga US nationals, ilabi na ang mga nangin biktima sang mga nahimo nga krimen sang mga nahatagan sang clemency.
