ROXAS CITY, CAPIZ – Naglab-ot na sa 3,335 nga minimum wage earners sa Western Visayas, kalakip ang 410 gikan sa Negros Occidental, ang nakabenepisyo sa P20 kada kilo nga bugas sa idalom sang rice subsidy program sang Department of Labor and Employment (DOLE).
Ang programa nga kilala bilang “Benteng Bigas Meron Na” (BBM) Rice Program may katuyuan nga mabuligan ang mga minimum wage earners nga makabakal sang bugas sa mas barato nga presyo.
Target sang programa ang mga mamumugon nga minimum wage earners sa mga pribado nga establisyemento, manpower agencies, security agencies, kag construction companies.
Sa interview sang Bombo Radyo Roxas kay DOLE Region 6 Assistant Regional Director Melissa Navarra, iya ginpahayag nga ang programa ginlunsyar sa regional level sadtong Hunyo 13, kag ginsundan sang mga launching sa nagkalain-lain nga probinsya sa rehiyon, kalakip na ang probinsya sang Capiz.
Kabulig sang DOLE sa programa nga ini ang Department of Agriculture (DA) kag Food Terminal Inc. (FTI) para makabakal sang bugas gikan sa National Food Authority (NFA).
Yari ang numero sang mga nakabenepisyo na sa nasambit nga programa as of July 31 nga datos sang DOLE Region 6:
- Aklan – 365
- Antique – 285
- Capiz – 890
- Guimaras – 575
- Iloilo – 185
- Negros Occidental – 390
Samtang, ginaganyat naman ni Navarra ang nagkalain-lain nga establisyemento kag mga organisasyon nga panginpuslan ang programa nga ini para sa ila nga mga empleyado.
Pahayag niya, sa mga nakabenepisyo na, mahimo pa sa gihapon nga magpadayon sa pag-avail sang programa kada bulan tubtob Disyembre, basta may nakahanda nga purchase order. Para naman sa mga wala pa naka-avail sang BBM rice program, mahimo nga magbisita sa mga field office sang DOLE sa ila nga mga probinsya sa Western Visayas, kun sa diin handa nga magbulig ang ahensya.
– With an interview from Bombo Lynd-C Bade
