Gin-anunsyo sang Philippine National Police (PNP) nga mapahamtang sila sang 37,750 nga mga pulis sa idalom sang Oplan Balik-Eskwela 2025–2026, sa bilog nga pungsod bilang kabahin sang luwas nga pagbukas sang klase sa Lunes, Hunyo 16, 2025.
Suno sa PNP, pagabantayan sang mga pulis ang yara sa 45,974 nga mga buluthuan kalakip diri ang 38,292 nga mga pampubliko nga eskwelahan kag 7,682 nga private schools.
Magapahamtang man sang 5,079 ka mga police assistance desk nga pagadumalahan sang 10,759 ka mga pulis, samtang 10,687 ang magapatigayon sang mobile patrols kaupod pa ang 16,366 nga foot patrols.
Sa datos sang Polisya, ang pinakadako nga deployment sang mga pulis ang yara sa Central Visayas nga may yara sang 7,366 pulis, sa Metro Manila: 4,323, Bicol Region: 2,962, Eastern Visayas: 2,376, kag sa Bangsamoro Region: 2,898 ka mga pulis para sa 657 nga mga buluthuan.
Una na nga ginsiling ni PNP Chief Gen. Nicolas Torre III, nga ang kaluwasan sang mga estudyante, manunudlo, kag mga school staff ang ila nga nagapanguna nga nga katuyuan sa pag-umpisa sang klase.
Samtang, suno pa sa PNP, generally peaceful ang preparasyon sa pagbubukas sang klase sa bug-os nga pungsod.
