Natalana nga igasubasta sang National Food Authority (NFA) ang masobra 37,000 metric tons (MT) sang daan nga bugas agud mapahagan-hagan ang mga bodega kag mapaayo ang inventory turnover antes ang palaabuton nga ani.
Suno sa bid invitation, ginpahayag sang National Food Authority nga ang subasta ang magasakup sang 737,339 ka 50-kilogram bags sang bugas, ukon kabug-usan nga 36,867 MT, nga ginabulubanta nagabalor sang P909.8 million.
Isa ka pre-auction conference ang natalana sa Pebrero 13, samtang ang pagbukas sang mga auction tenders pagahiwaton naman sa Pebrero 20.
Ang stocks nga igatanyag nagalab-ot sa P22.52 kada kilo tubtob P25.16, depende sa kon ano na kadugay nga natago ang bugas.
Ang bugas gintago sa tunga sang tatlo kag 18 ka bulan, nga may 88.1% sa tunga sang tatlo kag siyam ka bulan ang edad.
Ginreport man sang NFA nga tubtob Enero 31, ang ila imbentaryo sang milled rice katumbas sa 8.52 milyon ka sako, ukon ginabanta 426,000 MT, lakip ang bugas nga wala pa nagaling.
Suno sa NFA, katumbas sang 11.03 ka adlaw nga kinahanglanon ang national rice reserve.
