Masobra 40 ka tawo nga ginaalegar naangot sa maanomaliya nga flood control projects sa Bulacan kag Oriental Mindoro ang lauman nga mapreso subong nga Nobyembre.
Ini ang ginpahayag ni Department of Public Works and Highways (DPWH) Secretary Vince Dizon.
Suno sa iya, indi na kinahanglan pa nga maghulat ang publiko sang Disyembre bangud subong nga Nobyembre pa lang ang may mapreso na.
26 ka mga indibidwal sa Bulacan lakip na ang mag-asawa nga Discaya kag si former District engineer Henry Alcantara kag ang 15 ka iban pa sa Mindoro lakip na si former congressman Zaldy Co kag kompaniya sini ang posible nga mapreso sa duha pa lang ka kaso.
Pahayag niya, nagsiling si Ombudsman Jesus Crispin “Boying” Remulla nga ang kaso kriminal nga naangot sa flood control projects sa Bulacan kag Oriental Mindoro ang ipasaka subong ukon sa masunod nga semana.
Nahibaluan nga si Co ang wala pa sa gihapon makabalik sa Pilipinas humalin sang naangot ini sa kontrobersiya sa flood control.
Samtang, gina-prioritize na sang Independent Commission for Infrastructure ang 80 sa initial nga 421 ka mga flood control projects nga imbestigaran bangud sa kurapsyon.
