ROXAS CITY – Masobra 4 mil ka mga mangunguma sa karon ang apektado ang ila tagsa ka mga ulumhan bangud sang epekto sang tuman ka init nga panahon.
Ini ang base sa initial damage report nga ginsumiter sang mga kabanwahanan sa probinsiya sa Office of the Provincial Agriculturist.
Sa nasambit datos, ang apektado nga mga mangunguma amo ang gikan sa banwa sang Sigma, Panit-an, Pontevedra, Sapian, Pilar, President Roxas, Maayon, Jamindan, kag Panay.
Bangud sang epekto sang dry spell, kapin sa 29 milyones pesos ang kabug-usan nga kantidad sang kahalitan sa mga ulumhan sang nasambit nga mga mangunguma.
Bangud diri, ginpasalig sang ahensiya nga nakahanda sila nga magbulig sa apektado nga mga mangunguma pinaagi sa paghatag sang seedlings gikan sa Department of Agriculture (DA).
Gindugang pa diri nga may igahatag man nga bulig ang Philippine Crop Insurance Corporation (PCIC) sa mga mangunguma nga nakapa-insured sa ila ahensiya nga maapektuhan sang dry spell.
