Naglab-ot sa masobra 7,700 nga online gaming websites ang ginatinguhaan sa karon nga i-shutdown sang Philippine Amusement and Gaming Corporation ukon PAGCOR.
Ginpahayag ni PAGCOR Chairman Alejandro Tengco sa hearing sang senado nga sumugod sang nagpungko ini sa nasambit nga ahensya, nalista sang mga otoridad ang yara sa 7,747 nga illegal operators sang mga online games.
Suno naman kay PAGCOR Senior Vice President Raul Villanueva, halin pa sadtong Setyembre 2022, gina-monitor na nila ang tanan nga illegal sites indi lamang ang mga illegal nga online games kundi kalakip man diri ang e-sabong, facebook ads, mobile applications, offshore sites kag mga spam messages kasubong sa telegram chats kun sa diin naga-advertise ang mga illegal game.
Sa nasambit nga numero, 5,793 ukon 74.78 percent ang na-blocked na sang PAGCOR samtang yara sa 1,954 nga illegal online gaming websites pa ang aktibo.
Suno diri, duha ka pamaagi ang ginagamit nila agud dalayon nga matapna ang mga illegal nga e-games, ini amo ang pag-block sa mismo nga website ukon sa uniform resource locators (URLs) kag payment blocking.
Sa payment blocking, nakig-angut na ang PAGCOR sa Gcash kag Maya samtang nagdangop naman ang ahensya sa Google kag Apple agud ipa-shutdown ukon ipakakas sa ila nga mga play store ang mga application sang mga illegal nga online gaming site.
