CAPIZ- Nakabalhag ang Capiz Provincial Health Office (PHO) sang kabug-usan 934 ka mga kaso sang Human Immunodeficiency Virus (HIV) base sa datos sang Hunyo 2025.
Sa interview sang Bombo Radyo kay Mr. Carlo Paolo Bermejo, Health Program Officer sang Capiz Provincial Health Office, iya ginpahayag nga kadam-an sa mga nabalhag nga may kaso amo ang mga indibidwal nga naga-edad 25 tubtob 34, samtang padayon man nga nagasaka ang numero sang mga kabataan nga 15 tubtob 24 nga na-diagnose.
Suno kay Bermejo, wala sang gina-pili nga edad ukon gender ang HIV, kag mahimo nga malapnan ang sin-o man kun ini ang na-expose sa virus. Isa man sa mga nagakakita nga rason sang pagtaas sang kaso sa mas bata nga populasyon amo ang mother-to-child transmission ukon ang vertical transmission, kung sa diin nagakapasa ang HIV halin sa Iloy nga may HIV sa lapsag samtang nagabusong, nagbata ukon nagapasuso.
Hugot man nga ginhatagan pagtamod sni Bermejo ang “HIV Alphabet” bilang pagsulundan sa pag-likaw sa balatian sa diin amo ang mga masunod:
A — Abstinence,
B — Be faithful,
C — Correct use of condom,
D — Do not abuse alcohol and drugs,
E — Early detection, early treatment, early education.
Ginpahumduman man sang natungdan ang publiko nga mahimo matapna ang paglapta sang HIV pamaagi sang regular nga pag-inom sang antiretroviral therapy (ART)agud mangin undetectable ang viral load, insakto nga paggamit sang condom, paglikaw sa pagbaylu-anay sang kagamitan nga mahimo may dugo, pagpabulong sa Sexually Transmitted Infections (STIs), kag pagpangayo sang insakto nga paathag gikan sa health providers natuhoy sa luwas nga aktibidad kag insakto nga pagdeklara sang HIV status.
Reported by Bombo Sunnie Mae Constantino Batencila
