Nagpatigayon sang search warrant operation ang Pilar Municipal Police Station (MPS) sang Disyembre 26, 2025, sa isa ka balay sa Barangay Casanayan, Pilar, Capiz may kaangtanan sa paglapas sa Republic Act 9165 ukon Comprehensive Dangerous Drugs Act.
Sa interview sang Bombo Radyo kay Police Captain Merry Chris Dela Cruz, Police Information Officer sang Capiz Police Provincial Office, iya ginpahayag nga ang search warrant operation ang ginpatigayon sa puly-an sang isa ka high school teacher bilang kabahin sang padayon nga kampanya sang kapulisan batok sa iligal nga droga kag para sa pagpasiguro sang kaluwasan sang publiko.
Suno kay Police Captain Dela Cruz, nakumpiska sang kapulisan ang 11 ka sachet sang ginapatihan shabu nga may kabug-usan nga bug-at nga kapin 60 ka gramo kag ginabulubanta naga balor sang ₱408,000, kag duha ka sachet sang ginapatihan marijuana nga may bug-at nga 10 ka gramo kag ginabulubanta nga balor nga ₱12,000.
Naglab-ot sa kabug-usan nga ₱420,000 ang balor sang mga nakumpiska nga iligal nga droga.
Pahayag pa niya, ang mga nakuha nga ebidensya ang yara sa kustodiya sang Pilar Municipal Police Station para sa husto nga dokumentasyon kag dugang nga imbestigasyon.
Pagapasakaan man sang nagakaigo nga kaso ang suspek sa masunod nga mga inadlaw.
Nagpanawagan man ang natungdan ang padayon kag mas ginpabakod sang ila talatapan ang kampanya batok sa iligal nga droga kag ginapahanumduman ang publiko nga makig-angot sa kapulisan kun may report sang bisan ano nga indi maayo nga aktibidad sa lugar.
