Naglab-ot na sa masubra 100,000 katawo nagikan sa Albay ang ginpa-evacuate padulong sa mga evacuation center sa tunga sang mga pagbaha nga halit sang bagyong Kristine, suno kay Albay Acting Governor Glenda Bongao.
Madamu sa mga residente, suno kay Gov. Bongao, ang nakibot sa madasig nga pagbaha ilabi na sa mga lugar sa Albay nga wala anay gin-abot sang tubig-baha.
Madamu man sa mga ini ang nagpakampante rason nga wala na nagbalhin bag-o pa man ang pagbubo sang mabaskog nga ulan.
Suno naman kay Albay Provincial Disaster Risk Reduction and Management Office officer-in-charge engineer Dante Baclao, ulihi nga naka-eksperyensya ang probinsya sang Albay sang kapareho nga pag-ulan kag pagbaha, 55 ka tuig na ang nakaligad.
Magluwas sa masubra 100,000 katawo nga yara sa mga evacuation center,pila man sa mga residente ang ginpili nga temporaryo nga makigpuyo na lamang sa mga kakilala kag mga kapamilya.
