Nagguwa ang mga pangalan nanday Baguio City Mayor Benjamin Magalong kag former Department of Public Works and Highways Secretary Rogelio “Babes” Singson nga ginaalegar napilian ni Presidente Ferdinand Marcos Jr. nga magapungko sa independent commission nga maga-imbestigar sa kurapsyon nga naangot sa flood control program sang gobyerno.
Ginapahayag nga ginbaton na ni Magalong ang imbitasyon sang Presidente matapos nga ginbaton man ni Singson nga mangin kaupod sa three-member body.
Sa subong, nagapangita pa si President Marcos sang ika-tatlo nga myembro para sa independent commission.
Nahibaluan nga si Magalong ang isa ka retired general nga nakatukod sang reputasyon bangud nanguna ini sa pag-imbestigar sa kamatayon sang 44 police commandos sa engkwentro sa tunga sang Moro rebels sa Mamasapano, Maguindanao sang tuig 2015.
Nagsulod siya sa pulitika kag na-eleher bilang alkalde sang Baguio City sang 2019.
Samtang si Singson naman ang nangin Secretary sang Department of Public Works and Highways sang tion sang Aquino administration sa diin nakilala ini sa paghimo sang mga pagbag-o sa procurement process kag sa implementasyon sang proyekto.
Ginalauman nga maga-issue si President Marcos sang executive order sa pagtukod sang independent body subong nga semana.
