ROXAS CITY – Nagalaum si Dumarao Mayor Matt Hachuela nga mangin malinong kag matawhay ang pagahiwaton nga Barangay kag Sangguniang Kabataan Eleksyon sa palaabuton nga Oktubre 30, 2023 sa ila banwa.
Sa interview sang Bombo Radyo kay Hachuela, ginpahayag sini nga may yara lamang sang apat ka mga barangay sa ila banwa ang makabig nga indi mapabilin ang matawhay sa tion sang pagpiniliay.
Ginpahayag man sang alkalde nga kun tani wala sang may matabo nga pagpinilitay ukon pagpamahog sa tanan nga mga botante agud hilway sila nga makapili sang kandidato nga luyag nila magpungko sa pwesto.
Samtang, preparado na ang LGU sang Dumarao para sa pagahiwaton nga Peace Signing bwas nga adlaw Setyembre 27, kung sa diin pagahiwaton sa atubang mismo sang simbahang katolika alas 8:00 sang aga.
Diri obligado nga magtambong ang tanan nga mga nagapadalagan nga kandidato kung sa diin nagasunod sila nga mangin malinong kag matalunsay ang pagahiwaton nga eleksyon.
