Roxas City – Ginasigurado ni Mayor Raymond “Monmon” Malapajo sang banwa sang Maayon nga indi na maglapta ang African Swine Fever (ASF) sa pila ka mga Barangay sa ila nga banwa.
Sa interview sang Bombo Radyo kay Malapajo, ginpahayag sini nga nahinalaan na nila kaupod ang 32 nga mga punong Barangay sa ila lugar kun paano malikawan nga maglapta kag dalayon na nga matapna ang amu nga sakit.
Suno pa sa alkalde isa sa ila ginapatigayon nga tikang amu ang pagpahamtang sang mga Barangay checkpoint agud mapamalabagan ang mga nagapasulod kag nagapaguha sang karne sang baboy.
Makabig man ini suno diri nga isa ka pagtilaw sa mga pumuluyo ilabi na sa ila nga mga opisyales bangud may yara sa gihapon nga mga nagatesting nga nga makalusot pina-agi sa pag-agi sa mga dala nga mahimo lakturan.
Indi man suno diri, mahupos ang ila nga pagpanikasog agud matapna ang amu nga sakit sa mga kasapatan apang ginahimo nila ang ila nga masarangan kag obligasyon agud indi na maglapta pa sa iban nga mga Barangay sa diin mahimo maka-apekto sang dako indi lamang sa mga pumuluyo kundi subong man sa mga negosyante.
Matandaan nga ang Maayon ang labing una nga banwa nga nakabalhag sang kaso nga ASF sa probinsya sang Capiz.
Bangud sini, nagpangabay man ini sa mga Barangay officials nga kun mahimo bantayan ang mga boundary sa ila lugar tubtob magab-i agud masigurado nga wala sang may makalusot nga karne kag buhi nga baboy.
Pananglitan nga may mga madakpan sila sa checkpoint gilayon nial suno diri nga ginapabalik ang mga ini sa baylo nga kumpiskaron ang ila mga dala nga sapat.
Samtang dako man ang paglaum ni Malapajo nga maga-kooperar ang pumuluyo sang Maayon agud dalayon na nga matapna ang paglapta sang African Swine Fever (ASF) sa pila ka mga Barangay sa ila nga banwa.
