ROXAS CITY – Tuman ang pagpasalamat ni Mayor Dodoy Perez sa wala untat nga suporta sang mga pumuluyo rason nga nangin madinalag-on ini sa liwat nga piniliay sa pagka-alkalde sa banwa sang Pilar.
Sa interview sang Bombo Radyo, ginpahayag sini nga wala ini nagalaum nga dako ang mangin abanse sa kasumpong sa pagka-alkalde kag indi sini malab-ot ang kadalag-an kun indi bangud sa mga Pilareños.
Nagapasalamat ini sa mga pumuluyo nga padayon nga nagapati sa iya nga tampad kag sinsero nga pagserbisyo apisar may yara sang mga pagpatalang kag kabutigan nga ginahaboy sa iya.
Sa iya nga termino, pagapadayon ni Perez ang wala pa natapos nga mga proyekto kag maga-patuman sang panibag-o para sa ikaayo kag ikauswag sang banwa.
Mahibaluan nga nakakuha si Reelectionist Mayor Perez sang 12,628 total number of votes kag ginsundan sang kasumpong nga si Inday Rita Patrico nga may yara sang 6,774 nga mga boto.
