ROXAS CITY – Positibo si Roxas City Mayor Atty. Ronnie Dadivas nga malab-ot ang mga handum sini para sa nasambit nga syudad sa sulod sang tatlo ka tuig.
Si Dadivas ang liwat nga na-eleher bilang alkalde sang Roxas City sa ika-tatlo na sini nga termino.
Sa interview sang Bombo Radyo kay Mayor Dadivas, iya ginpahayag nga magapadayon sa gihapon ang mga naumpisahan na sang iya administrasyon kaangay na lang sang Bugas para sa taga-Roxas, pag-improve sang health services program, amo man ang mga infrastructure projects kaangay sang nagapadayon nga Civic Center nga mangin Convention Center, ang ginakaayo nga bag-o nga Roxas City Hall, Medical Complex, Libas Fishing Port kag bag-o nga slaughterhouse.
Suno sa alkalde, ginakalipay gid niya nga masobra 38,000 ka mga pamilya ang nagabaton sang 15 kilos nga bugas kada 45 ka adlaw gani nga ginahalongan gid sini nga indi madula ang nasambit nga programa bangud madamo ang nagabenepisyo.
Sa ginakaayo nga Roxas City Hall naman sa Pueblo De Panay pahayag niya, posible nga matapos ang construction sa last quarter sang 2026 ukon first quarter sang 2027.
Luyag ni Mayor Dadivas nga magbilin sang legasiya sa syudad sa tion nga matapos ang iya nga termino sa diin ginatatap ang mga tawo, ginahatagan sang dignidad ang kada isa kag mapa-umwad ang kabuhi sang mga taga Roxas.
Indi pwede pahayag niya nga naga-improve ang Roxas City apang ginagutom ang tawo.
Nagakadapat suno sa alkalde nga unahon gid ang mga tawo bangud sila ang nagabulig sa pagpadalagan sang ekonomiya sa syudad.
Nagpasalamat man si Mayor Dadivas sa tanan nga nagsuporta sa iya ilabi na sa iya pamilya, Department heads, kag mga kaupod sini sa partido.
– With a report from Bombo Lynd-C Bade
