Nakit-an na sang mga otoridad ang isa menor de edad nga ginpahayag nadula samtang nagapaligo sa baybayon sang Barangay Pawa, Panay, Capiz.
Ginkilala ang biktima kay alyas “MakMak”, nagapang-edaron sang 7-anyos kag residente sang Panay Ville Pob. Ilaya, Panay Capiz.
Sa nakuha nga impormasyon sang Bombo Radyo nagikan sa Panay MPS, may nabaton sila nga report nagikan kay Punong Barangay Edgardo Baguio, kapitan sang nasambit nga lugar nga may isa ka menor de edad nga ginaalegar nadula kag nalumos sa nasambit nga lugar.
Gilayon naman ini nga ginpadulungan sang katapo sang mga kapulisan agud magpatigayon sang nagakaigo nga imbestigasyon kag nahibaluan nga samtang nagapulopaligo ang biktima kaupod sang iya mga kaupdanan nga mga menor de edad, hinali nalang nga ginhampak ang mga ini sang nagadalagkuan nga balod kag wala na makita ang amo nga biktima sang iya mga kaupdanan.
Nagapati naman ang pamilya sang biktima nga wala sang natabo nga foul play sa nasambit nga insidente.
Sa karon, yara na ang biktima sa isa ka punerarya sa nasambit nga banwa.
