Yara na sa paghinakop sang City Social Welfare and Development Office (CSWDO) ang menor de edad nga nakuhaan sang armas-luthang sa buybust operation sang kapulisan sa Sitio Ilaya, Brgy. Tanque, Roxas City sang damlag lang.
Sa interview sang Bombo Radyo kay PCMS Ramil Arangeles, tagpamaba sang Roxas City Police Station, natigayon nga i-turnover sa CSWDO ang menor de edad matapos nga makighinala ang lola sang nadakpan sa katapo sang kapulisan partikular sa Women and Children Protection Desk.
Matandaan nga narekober sa paghinakop sang menor de edad ang isa ka unit sang .38 caliber nga armas-luthang, lima (5) ka bala kag P2,500 nga buybust money.
Pahayag pa ni PCMS Arcangeles, sandig sa panaysayon sang menor de edad, ang amu nga armas ang ginapanag-iyahan sang iya lolo kag ginbaligya niya online para kuntani nga makabakal sang cellphone kag inugbayad sa eskwelahan.
Wala naman ginalauman kag ginkakibot sang iya lola ang ginhimo sang menor de edad.
Samtang, panugyan naman ni PCMS Arcangeles sa mga ginikanan nga indi pagpabay-an ang ila mga kabataan, hatagan sang oras nga makaistorya agud mahibaluan kun may problema ini sa pag-eskwela ukon sa anuman nga butang.
