ROXAS CITY – Ginaalegar gintuyo gamiton sang biktima nga si Jun Mencedez, Principal sang Minoro Elementary School ang menor de edad nga suspek rason nga napatay siya sini.
Ini ang nangin pahayag ni Punong Barangay Renante Leonardo, Kapitan sang Barangay Balat-an, Mambusao sang eksklusibo nga mainterview sang Bombo Radyo.
Suno kay kapitan, ginsugid sa iya sang suspek nga si John Peter Obarra nga ginhagad lamang siya sang biktima kag abyan sini nga si Alvin Aniero nga mag-inom-inom sa apartment.
Nauna suno diri pauli si Aniero kag nabilin ang suspetsado kag ang biktima kaupod ang 9-anyos nga bata sini sa apartment, apang sa tion nga mapauli na ang suspek gintuyo siya nga gamiton sang biktima rason nga nagluntad ang komosyon tubtob sa naglab-ot sa pagsakitanay kun sa diin ginkuga siya suno diri sang biktima rason nga nagpanulom ang iya panan-awan kag ginkuha sini ang gunting nga nakit-an nga amu ang gingamit buno sa biktima.
Dugang pa ni kapitan nga nabatian sang bata ang kinagamo gani nagpalapit ini sa ila kag nagpugong rason naigo man ini sa pagpangbuno sang suspek.
Pagkatapos sang krimen ginapahayag nagpauli si Obarra sa boarding house nga iya ginatineran sa Barangay Dayao sining syudad kag ginhulat ang iya ginikanan nga mag-abot bangud wala ini nakahibalo sang iya himuon.
Gintuad pa ni Kapitan Leonardo nga wala sang rekord sa ila Barangay ang suspek kag sa iya ini una boluntaryo nga nagsungka.
