POBLACION, Dumalag, Capiz – Patay ang isa ka menor de edad matapos ang nagluntad nga insidente sa Barangay Poblacion, Dumalag, Capiz.
Ginkilala ang biktima sakay alias Toto, 15-anyos, grade 10 student, samtang ang driver naman sang bus amo si alias Lolito, 49-anyos, isa ka driver nga may yara sang kompleto nga papeles sa pag maneho.
Matandaan nga natabo ang insidente Agosto 15, sa takna sang alas 5:50 sang hapon kun sa diin involved ang isa ka ceres bus kag motorsiklo nga ginamaneho sang menor de edad.
Sa interview sang Bombo Radyo kay Police Major Amie F. Bulaquiña, Officer in Charge sang Dumalag Municipal Police Station, iya ginpahayag nga sandig sa imbestigasyon sang Dumalag Municipal Police Station ang bus ginasubay ang dalanon nagikan sa Roxas City pakadto sa Tapaz Capiz, samtang naga travel naman sang opposite nga direksyon ang menor de edad sa diin hinali ini nga bumunggo sa naka sugata nga bus.
Suno kay PMAJ Bulaquiña, nahauna nga narekord sa bulan sang Agosto ang nasambit nga insidente kag kun tan-awon naman suno sa rekord sang Dumalag Municipal Police Station masami na nga ginatunaan ang dalanon sang insidente bangud sa taklaron nga pakurbada ang dalanon.
Pahayag pa niya naga kay-o si alias Toto sang iya motor kag gina test drive niya ini pakadto pakari kun sa diin pakadto siya sa Poblacion Dumalag apang sa wala niya ginalauman nasugata niya ang bus nga pasaka sa kuntani pakadto sa Tapaz Capiz area.
Sa dugang pa nga impormasyon nakaagom sang pilas sa parte sang ulo si alias Toto nga kun sa diin madamo na ang nadula nga dugo kag gilayon naman ini nga ginrespondihan sang Dumalag response team nga gindala sa isa ka pampubliko nga hospital kag bangud sa malala nga sitwasyon niya gin refer pa nga ihalin ini sa isa ka hospital sa bahin sang Iloilo, apang sa masubo nga balita gindeklarar nga patay na ini sang attending physician sa hospital.
Dugang pa sang natungdan wala na sang plano nga magpasaka sang kaso ang pamilya sang biktima kag sa karon ginahingyo na lang nga mangin responsable sa pag bulig sa tanan nga galastusan ang driver nga si alias Lolito kag nagapromisa naman nga igahatag niya ang tanan nga mabaton nga isurance sa pamilya sang biktima.
Sa karon ang amo gani nga hitabo suno kay PMAJ Bulaquiña, mahimo gid nga malikawan pinaagi sa Oplan Sagip Bata sang Philippine National Police “PNP”, ini amo ang inisyatibo nga pagdumili sa pag drive sa mga menor de edad kag kun mahimo nga madakpan sila igapahamtang sa Municipal Social Welfare and Development Office “MSWDO”, kaupod ang ila ginikanan para sa ginatawag nga couselling kag intervention nga may daku nga bulig sa hugot nga pagpatuman sa pagdumili sa pagmaneho sang kabataan.
