ROXAS CITY – Pilason ang isa ka menor de edad matapos ginlabo sang iya stepfather sa Brgy. Matinabus, Sigma, Capiz.
Ang wala na ginhingadlan nga biktima ang nagapang-edaron sang 8-anyos, samtang ang ginapahayag nga suspek amu ang iya stepfather nga ginkilala kay alyas Jo, 44-anyos kag lunsay mga residente sang nasambit nga lugar.
Sa inisyal nga impormasyon nagikan sa Sigma Municipal Police Station, natabo ang insidente alas 6:30 kahapon sang aga, Hulyo 10, 2024. Ginapahayag nga nakainom ang suspek kag samtang nagakatulog ang bata sa sulod sang kwarto sang ila balay, hinali nalang ini ginlabo sang iya stepfather.
Bangud sini nag-angkon sang pilas sa tuo nga porsyon sang ulo ang biktima nga gilayon naman gindala sa Dao District Hospital para sa nagakaigo nga pagbulong.
Samtang, kapigaduhon kag problema sa pamilya ang ginalantaw nga motibo sang kapulisan sa natabo nga insidente.
Nahibaluan nga nagatrabaho sa luwas sang pungsod ang iloy sang bata.
Sa karon, nakahunong na sa karsel sang Sigma PNP ang suspek kag natalana nga pasakaan sang nagakaigo nga panumbungon.
