DUMARAO CAPIZ – Pilason ang isa ka menor de edad nga lalaki, matapos ginapahayag nga ginluthang sa Barangay Malonoy, Dumarao Capiz.
Ginkilala ang biktima kay alyas “Greg”, samtang ang ginapahayag naman suspek ang ginkilala kay alyas “Eweng”, yara sa legal nga pang-edaron kag lunsay mga residente sang nasambit nga lugar.
Sandig sa impormasyon nga nakuha sang Bombo Radyo nagikan sa Dumarao Municipal Police Station, ginapahayag nga nagsugat-anay ang suspek kag biktima kag may nagluntad nga komprontahanay sa magtimbang nga bahin kag hinali lamang nga ginluthang sang suspek ang biktima gamit ang isa ka unit sang 12 gauge shotgun nga armas luthang.
Madasig naman nga ginpadangat sa Dao District Hospital ang biktima para sa nagakaigo nga pagbulong.
Samtang, natigayon naman nga maaresto sang otoridad ang suspek matapos makumiter ang krimen.
Mahibaluan daan nga hiligut-anon ang ginalantaw nga motibo sa nagluntad nga insidente.
Sa karun yara na sa paghinakop snag Dumarao MPS ang suspek para sa nagakaigo nga disposisyon.
