ROXAS CITY – Gin-athag sang Metro Roxas Water District nga napahibalo ang publiko sa water interruption nga natabo sa Roxas City kag banwa sang Panay antes pa man ang scheduled nga petsa sang nagligad nga Enero 10.
Sa advisory nga gin-post sang Metro Roxas Water District sa ila facebook page sang Enero 9, ila gin-anunsyo nga may yara sang kaayuhon ang ila Engineering, Construction, and Maintenance Department humalin las 9 sang gab-i sang Enero 10 tubtob las 3 sang aga sang Enero 11 sa pila ka mga Barangay sa syudad sang Roxas kag banwa sang Panay nga magaresulta sang water interruption.
Sa interview sang Bombo Radyo kay Mark Vincent Bernas, Information Officer sang Metro Roxas Water District, iya ginpahayag nga mas napatimprano ang pagbalik sang supply sang tubig sa diin nakumpleto ang maintenance work las 12 sang kaagahon sang Enero 11 kag indi sa na-schedule nga las 3 sang kaagahon.
Suno kay Bernas, padayon nga ginatinguhaan sang water district ang pagsolbar sang low pressure to no-water issues sa diin ang problema nga ginalantaw amo ang sa bahin sang distribution bangud pila ka mga reservoir sa mga malayo kag mataas nga lugar ang mahimo nga indi malab-ot sang tubig.
Nagpanawagan man ang natungdan sa publiko nga direkta nga ipalab-ot ila nga opisina ang mga reklamo agud mahatagan sang madasig nga solusyon.
