ROXAS CITY – Ginpalab-ut sang Chairman sang Committee on Fisheries and Aquatic Resources sa Sangguniang Panlungsod ang pagkadismaya sini sa presensiya sang madamo nga basura sa Panay River.
Ginpahayag ni City Councilor Moreno Gonzaga, Chairman sang Committee on Fisheries and Aquatic Resources sang Sangguniang Panlungsod nga personal sini nga nakita ang madamo nga basura sa nasambit nga suba.
Suno kay Gonzaga nga sinako nga mga basura kalakip na ang mga plastic kag iban pa ang nakita sini sa suba nga ginapatihan nagikan sa Teodoro Arcenas Trade Center ukon TATC.
Apang, natukiban man sini nga gikan ang iban nga mga basura sa Jumbo Bridge, sa tulay sang Barangay Cagay kg Barangay Dayao nga ginapatihan naman sang konsehal nga ginhaboy sang mga residente nga nagaistar malapit sa suba.
Bangud sini, ginkaalarma ini ni Gonzaga rason nga ginpalab-ut ang nasambit nga problema sa konseho sang siyudad pinaagi sa isa ka privilege speech.
Gilayon man sini nga ginpalab-ut sa pamunuan sang Bureau of Fisheries and Aquatic Resources ukon BFAR ang nasambit nga problema.
Samtang, ginpasalig naman ni Gonzaga nga igapatawag sini ang mga Barangay Officials nga may mga residente nga naga-istar malapit sa suba agud matapna ang paghaboy sang basura.
Nagapati naman si Gonzaga nga dalayon nga mahalitan ang mga kasubaan sa tion nga indi matapna ang paghaboy sang mga basura.
