ROXAS CITY – Iga-refund sang Capiz Electric Cooperative (CAPELCO) ang gingasto sang mga benepisaryo sang National Housing Authority (NHA) nga pabahay sa pagpatakud sang kuryente.
Ini ang ginkumpirmar ni Mr. Rey Cordenillo, Member Services Division Supervisor sang CAPELCO sang mainterview sang Bombo Radyo.
Ginsiling sini nga ginrelease na sang National Electrification Administration (NEA) ang P23,782,270 nga pondo nagikan sa National Disaster Risk Reduction and Management (NDRRM) Fund agud mabuligan ang mga apektado sang bagyong Yolanda.
Target sang kooperatiba nga mahatagan sang refund kag outright energization ang 8,095 nga mga benepisaryo sa bug-os nga probinsya.
Suno kay Cordenillo, ang pagrefund ang nakadepende sa gingamit nga kagamitan sang pagpatakud sang kuryente.
Sa outright energization naman, kinahanglan lamang magbayad sang P5 ka membership fee sa mga first time magpatakud kag libre na sa masunod.
Pahayag ni Cordenillo, hulaton lamang ang ila pagpadulong sa mga sites para sa pagrelease sang refund, kinahanglan lamang magdala sang ID kag electric bill bilang pamatuod.
Mahibaluan, nga may pila ka mga sites ang may manubo nga numero sang turnouts kun sa diin ginaganyat sang opisyal nga mag-apply na ang mga benepisaryo sa mga otorisado nga focal person.
