ROXAS CITY – Nagdangup na sa talatapan sang National Bureau of Investigation (NBI) Regional Office 6 sa Iloilo City ang una nga batch sang mga complainant nga biktima sang ginaalegar FOREX Investment Scheme.
Suno sa 32 ka wala ginhingadlan nga complainant nga magapasaka sila sang reklamo nga syndicated estafa batuk sa ginatudlo leader nga si Lourdes Bulaqueña Baarde, anay empleyado sang Bureau of Internal Revenue sa kapaslawan nga mahatag ang ginpromesa nga 20 porsyento nga interest kada bulan.
Kalakip man nga pasakaan sang reklamo sang grupo sa NBI si Genlinski Bravo, ang ginaalegar recruiter nga nagrecruit sa ila kag nagpakilala kay Baarde.
Ba-se sa pagsaysay sang isa ka negosyante nga nagsugod ini nga mag-invest sa kantidad nga P20,000 sadtong tuig 2017 kag nagpasugot sa lock-in contract nga indi pagtandugon ang interes sa sulod sang tatlo ka bulan.
Bangud yara sa pinsar nga mapadaku pa ang iya kuwarta, ginreinvest sini ang kapital kag savings, tobtob naglab-ot na ini sa P200,000.
Nabalaka lamang ini sa iya nga investment matapos maglapta ang kontrobersiya, kag nadismaya ini sang mahibaluan sa banko nga sarado na ang account ni Baarde.
Sa karon nagalab-ot na sa 68 ka mga professionals ang nagguuwa kag ginreklamo si Lourdes Bulaqueña Baarde.
