ROXAS CITY – Nanugon ang pila ka mga residente nga biktima sang sunog sa Rizal St. Barangay VII, Roxas City sa P5,000 nga ila kuntani paga-batonon bilang bulig nagikan sa Pinuno Partylist.
Sa interview sang Bombo Radyo kay alyas ‘Dodoy’ ginaalegar ginhambalan sila sang mga Barangay Offical kag mga Barangay Health Workers (BHW) nga indi magpalista kag mangin loyal sila sa Uswag Ilonggo kag City Government agud wala sila sang problema nga paga-atubangon.
Pahayag ni alyas ‘Dodoy’ ang iban nagpalista man kay nanugon sa P5,000 nga daku ang mabulig para idugang pamakal sang ila mga kinahanglanon kag kagamitan.
Dugang pa ni ‘Dodoy’ luyag niya kuntani maka-baton man sang P5,000 apang indi ini magsugal ilabi na madamo na ang nagalapta nga istorya nga ginaalegar indi paghatagan sang balay ang magbaton sang bulig nagikan sa Pinuno Partylist.
Mahibaluan nga nakabaton na sila sang P5,000 halin sa City Government, P10,000 halin sa Uswag Ilonggo kag natalana nga magabaton sang dugang P20,000, P5,000 halin sa opisina ni Senador Loren Legarda kag P15,000 nga magahalin kay House Speaker Martin Romualdez.
