ROXAS CITY – Nagalaum si Pancho de la Cruz nga pamatian sang Commission en banc sang SEC ang sentimyento sang mga supporters ni Don Chiyuto sang Chiyuto Creative Wealth Document Facilitation Services (CCWDFS) kag indi basta na lamang hatagan sang bug-at ang imbestigasyon sang investigation department sang ahensiya angut sa ginasiling iligal nga operasyon sang Double your Money INvestmentt scheme.
Ginpahayag sang anay City Fire Marshall kuntani matandog nila ang balatyagon sang komisyon, labi na kun makita ang manifesto nga pirmado sang madamo nga mga creditors.
Ang ginaduso nga manifesto suno kay de la Cruz amo ang ground of human compassion kun mahimo pa nga ma-rekunsidera ang anay findings sang komisyon.
Kumpyansa man si de la Cruz nga may ikasarang nga bayaran ni Chiyuto ang iya mga creditors, apang indi sini mahimo sa karon bangud sa cease and desist order sang SEC.
Nagapati man ini sa ginpasalig ni Chiyuto nga tamdon sini ang iya obligasyon sa maabot nga Pebrero 14.
Ginapanindugan pa sini nga indi scam ang Double your Money investment scheme, bangud wala pa man sang nagreklamo nga na-scam sila.
Samtang nagpanawagan man ini sa gobyerno nga pamatian ang tingog sang mga pumuluyo kag mangin matood lamang sa mga kaugalingon.
