ROXAS CITY – Ginpatpat sang mga katapo sang Capiz Provincial Health Office ang mga dapat mahibaluan sa balatian nga HIV/AIDS kadungan sa pagsaulog sang World Aids Day 2023.
Sa interview sang Bombo Radyo kay Dr. Evelyn Bolido, Medical Specialist IV kag Chief sang Health System and Support Divison sang Capiz PHO, una diri gin-athag kun ano kinalain sang HIV kag AIDS.
Suno diri ang Human Immunodeficiency Virus (HIV), isa ka sahi sang virus nga naga-atake immune system sang isa ka indibidwal sa diin pananglitan indi mahatagan sang nagakaigo nga pagbulong posible magresulta sa Acquired Immunodeficiency Syndrome (AIDS) ukon most severe stage sang HIV infection.
Yari ang tatlo ka pamaagi kun paano nagalaton ukon mapasa ang HIV sa isa ka tawo: blood transmission, mother to child transmission kag unprotected sex.
Paathag ni Bolido, magamay ang tsansa nga malatnan ang isa ka tawo pinaagi sa blood transmission bangud antes igatughong ang dugo sa pasyente ginapaidalum na ini sa maid-id nga test sang Philippine Red Cross.
Yara naman sa 15-30% ang tsansa nga maangkon ang HIV pinaagi sa mother to child transmission kun ang iloy isa ka person living with HIV.
Samtang, ang unprotected sex naman ang may pinakamataas nga porsyento sa pagtransmit sang virus.
Pahayag sang doktor, 4 ka sahi sang body fluid ang maka transmit sang HIV amu ang dugo, semen, cervical fluid kag breast milk kag wala sang kontribusyon sa infection ang balhas, ihi, higko kag laway.
Mahibaluan sandig sa pinakaulihe nga datos sang Department of Health as of August 2023, ang pobinsya sang Capiz ang nakabalhag sang 669 ka kaso sang HIV sa diin 36 ang kababainhan kag 663 ang kalalakinhan.
Kadam-an diri amu ang naga-edad 25-35 anyos.
Samtang, ginakabalak-an naman sang Capiz PHO ang amat-amat nga pagtaas sa numero sang mga people living with HIV naga-edad 15-24 anyos ukon pamatan-on.
Suno kay Mr. Ayr Altavas, Public Information Officer sang Capiz-PHO, indi dapat magkahadlok ang may yara sang HIV bangud may natungdan nga ahensya kag nagkalain-lain nga organisasyon ang handa maghatag sang impormasyon kag ihibalo kun paano trataron ang HIV.
