ROXAS CITY, CAPIZ-Nagapanawagan ang mga katapo sang Bureau of Jail Management and Penology Roxas City Male Dormitory sa mga himata sang mga Persons Deprived of Liberty nga ila ini bisitahon ilabi na sa pagselebrar sang Holiday Season.
Sa interview sang Bombo Radyo kay Jail Superintendent Julius Ceasar Chavez, Jail Warden sang Bureau of Jail Management and Penology Roxas City Male Dormitory, iya ginpahayag nga isa ini ka dako nga butang para sa mga PDLs ang pagbisita sa ila sang ila tagsa ka mga pamilya agud nga magbakod ang ila nga mga huna-huna sa pag-atubang sang tagsa nila ka mga kaso.
Suno kay Chavez, mahimo gid nga magpadulong kag magselebrar sang Paskwa ukon bag-ong tuig ang tagsa ka mga pamilya sang mga PDLs nga ululupod sa sulod sang pasilidad.
Pahayag niya, naka-schedule naman sa tagsa ka dormitory ang Christmas party nga patigayunon nila para sa mga PDL sa diin nga nakaplastar naman. May yara man sang mga LGUs kag pila pa ka mga partner agencies ang naga-amat-amat naman sa pagpanagtag sang mga regalo sa mga PDL.
Nagapanawagan naman ang natungdan sa tagsa ka mga pamilya sang PDL nga kuntani, masami nila ini nga bisitahon ang ila nga mga himata agud madula man ang kasubo nga ila nabatyagan sa sulod.
Interviewed by Bombo Francis Biñas
