Liwat nakikita sang paglaum ang mga himata sang mga nadula nga mga manugbulang bangud sa mga rebelasyon sang testigo nga si alyas ‘Totoy’ angut sa nasambit nga kaso.
Sa isa ka dayalogo nga ginhiwat sang mga pamilya sang ‘missing sabungeros’ sa Department of Justice, ila gin-anunsyo nga nakakita sila sang paglaum kasunod sang mga rebelasyon nga nabuyagyag.
Makaligad ang pila ka tuig humalin sang ginreport ang pagkadula sang mga sabungeros, may mga bag-o nga report sa progreso sang nasambit nga kaso.
Suno sa isa sa mga himata sang nadula nga sabungero nga si Janice Esplana, ang pagtuhaw ni alyas ‘Totoy’ kag ang pagbuyagyag sang impormasyon nga iya nahibaluan amo ang iya ginakaptan agud maangkon ang hustisya.
Dugang pa niya, nga positibo ang nangin resulta sang sinapol nga ginhiwat upod sa Department of Justice angut sa pag-istoryahanay sa pagkadula sang ila mga himata.
Matapos ang sinapol nga ginhiwat sa Department of Justice, nagpaambit man ang isa pa ka himata sang mga biktima sang sabungero nga si Francsca Ramos ang iya hingyo angut sa nasambit nga kaso.
Emosyonal niya nga ginpabutyag ang iya panawagan kag pangabay nga pangitaon bisan ang mga bilin sang iya nga pinalangga.
Sa karon, padayon pa ang imbestigasyon angut sa pagkadula sang sabungero agud mahibaluan ang kamatuoran sa likod sang nasambit nga kaso.
