ROXAS CITY – Padayon nga ginamonitor sang pamunuan sang Department of Environment and Natural Resources-Environmental Management Bureau ukon DENR-EMB ang mga indibidwal nga nagahaboy sang basura sa Panay River.
Ini ang ginpahayag ni Engr. Marlon Bonite, Chief of Solid Waste Management Division sang ma-interview sang Bombo Radyo.
Ginpahayag ni Bonite nga padayon ang paglibot sang “Basura Patrolers” sa probinsiya agud mapasiguro ang katinlo sa palibot.
Suno kay Bonite nga ginapatawag sini ang mga barangay officials nga wala ginahimos ang nagalapta nga basura sa ila barangay.
Ginpahandum man ini nga yara sa lebel sang barangay ang paghimos kag pagbantay sa mga indibidwal nga nagahaboy sang mga basura.
Nagpaandam man ini nga mahimo pasakaan sang nagakaigo nga panumbongon ang mga barangay officials nga nagapabaya sa ila barangay pag-abot sa basura.
Luyag ni Bonite nga mahibaluan gikan kay City Councilor Moreno Gonzaga kun sa diin naghalin nga barangay ang basura nga nakita sini sa suba, agud gilayon nga ipatawag ang natungdan nga mga barangay officials.
Samtang, kakulangan naman sa garbage truck ang nakita sini nga rasun sang madata ang paghaboy sang basura sa siyudad sang Roxas.
