ROXAS CITY-Naglab-ot na sa 170 ka mga indibidwal ang natigayon nga natumod sang Department of Health-Capiz nga naka-close contact kay Capiz Governor Esteban Evan Nonoy Contreras matapos nga nagpositibo ini sa Coronavirus Disease ukon COVID-19.
Ini ang ginkumpirmar ni Mr. Joeffry Espiritu, Development Management Officer-IV sang DOH-Capiz sang mainterview sang Bombo Radyo.//
Suno kay Espiritu nga inisyal pa lamang ang ila nakuha nga datos kag posible nga madugangan pa ini.
Ginpahayag pa sini nga natalana nga ipaidalom sa interview ang mga indibidwal nga naka-close contact sa nasambit nga gobernador.
Magluwas diri, igaseparar ang mga indibidwal nga naka-close contact kag general contact kay Gov. Contreras.
Nahibaluan nga ang mga naka-close contact nga mga indibidwal nga nakaupod kag nakaistorya sang amo nga gobernador ang ipaidalom sa Real-Time Polymerase Chain Reaction ukon RT-PCR test.
Samtang ang mga indibidwal naman nga nakaupod sini sa isa ka lugar kag wala man nakaistorya kay Gov. Contreras ang gin-abisuhan nga magpatigayon sang strict home quarantine.
Padayon naman ang contact tracing nga ginapatigayon sang ahensya sa mga indibidwal nga nakasalamuha sang nasambitan nga gobernador.
