Nagkasugot na ang magtimbang nga bahin nga naulamid sa nagluntad nga pagka-sideswiped ukon ginapahayag Hit and Run sa Sitio Paon, Barangay Cogon, Roxas City.
Matandaan nga na-capture sang Closed Circuit Television (CCTV) ang pag-sideswiped sang tricycle sa biktima nga si alyas “Phoebe”, nagapang-edaron 65-anyos kag residente sang nasambit nga barangay.
Sa interview sang Bombo Radyo kay Kagawad Enrico Joseph sang Barangay Culasi, Roxas City, ginpahayag nga may pito tanan ka mga kalalakihan ang sakay sang tricycle kun sa diin lunsay mga residente ini sang ila nga lugar nga nagapang edaron sang 18, 20 kag 21.
Dugang pa sini, nagpadulong sa ila nga talatapan ang taglawas sang biktima sang pamilya agud makig-hinun-anon sa amu nga kabataan agud mapasabat ang kun ano man nga dapat nga pagasabton sang mga ini.
Sa pagpangusisa sang mga opisyal sang barangay sa mga kabataan, naguha nga sandig sa pahayag sang mga ini, wala nila madiparahan nga may na sideswipe sila nga persona rason nga deretso ang ila sini nga padalagan bangud nga maga-hampang sang volleyball sa amu nga lugar.
Nahibaluan nga ang tricycle nga gingamit sang amu nga mga kabataan ang ginapanag-iyahan sang isa nga sakay apang indi ini ang nangamot sa pagmaneho.
Samtang, padayon nga nagapaayo ang amu nga Ginang kag nagpahanumdum naman si Kagawad Joseph sa mga kabataan nga maghalong sa tion sa pagmaneho sang behikulo kag magsubay sa dalanon agud malikawan ang kun ano man nga sahi sang insidente.
