ROXAS CITY – Pagasuguran na sa masunod nga mga inadlaw ang mga infrastructure projects nga wala na-implementar sang nagligad nga tuig 2020.
Ginpahayag ni City Councilor Midelo Ocampo, chairman sang Committee on Infrastructure sang City Council nga ang mga infra projects nga gikan sa 20% development fund sang 2020 ang pagasuguran na ang implementasyon kasunod sang paghatag sang go signal sang alkalde sang syudad.
Gin-schedule naman ang bidding sa iban pa nga mga proyekto agud masuguran na ang implementasyon.
Natigayon man nga ma-award sa pila ka mga contractor ang proyekto, apang wala pa masuguran matapos nga wala pa naghatag sang go signal ang gobyerno sang syudad.
Aminado si Ocampo nga nagareklamo na ang mga contractor kag nagapamamngkot kun may mga dokumento pa sila nga kinahanglan i-comply, agud masuguran na ang implementasyon sang mga infra projects kasubong sang road rehabilitation kag repa
Suno sa konsehal may pila lamang ka mga isyu nga pagaklaruhon ang city government sa representante sang Department of Public Works and Highways nga magatambong sa patigayunon nga Committee hearing sang Committee on Infrastructure sa maabot nga Lunes nga adlaw, kun sa diin ginalauman ang presensiya ni City Engineer Noel Laminares sang City Engineer’s Office.
Nagahinyo ang city government sa DPWH nga kun mahimo unahon kaayo ukon i-rehabilitate ang gubaon nga karsada kag indi ang mga karsada nga maayo pa ang kondisyon ukon indi pa guba.
Nakita sang pamunuan sang gobyerno sang syudad nga indi pa guba ang karsada sa Legaspi pakadto sa Atila Balgos, gani mas maayo nga mangin prayoridad ang mga gubaon nga karsada agud mangin masulhay ang pag-agi sang mga motorista kag malikawan ang aksidente sa dalanon.
