Mga inmates sa Capiz, magaboto man sa Mayo 13 – BJMPROXAS CITY – Magaboto man sa mismo adlaw sang eleksiyon sa Mayo 13, 2019 ang mga inmates sa siyudad sang Roxas kag probinsiya sang Capiz.
Ini ang sandig sa direktiba mismo sang Bureau of Jail Management and Penology (BJMP), Department of Interior and Local Government, kag Commission on Election (Comelec).
Suno kay Provincial Warden Arjuna Yngcong sang Capiz Rehabilitation Center indi makaboto sang mga lokal nga kandidato ang mga persons deprived of liberty (PDL) kag limitado lamang ang ila nga pagboto sa mga senatorial candidates kag partylists.
Suno kay Yngcong nga magapadulong sa ila nga talatapan ang mga katapo sang Comelec kaupod man ang mga Board of Election Inspectors (BEI) bitbit ang mga balota nga gamiton para sa mga inmates.
Samtang suno naman kay Roxas City Jail Warden Senior Inspector Egbert Nagrampa, sila mismo ang magapadulong sa mga voting precincts sa siyudad kun sa diin nakarehistro ang mga PDL’s agud magkuha sang balota kag dal-on ini sa ila talatapan agud makaboto ang mga inmates.
Mahibaluan nga may 170 tanan ka mga inmates ang may yara sa BJMP – Roxas City Jail samtang 90 naman ka mga inmates ang yara sa CRC.
Patigayunon ang pagboto sang mga inmates sa visiting area sang nasambit nga mga talatapan.
