ROXAS CIY, CAPIZ – Daku ang posibilidad nga maghalin sa kooperatiba ang mga jeepney operator nga nakapa-consolidate na para sa modernization program kun pwesahon ini nga magkuha sang mga bag-o nga unit nga nagabalor masobra P2-million ang isa.
Sa interview sang Bombo Radyo kay Mr. Jobert Carandang, Presidente sang Piston-Capiz, may ara sang petisyon ang manibela kag piston nga ginapadala sa tanan nga miyembro angut sa pag-withdraw sang pagpa-consolidate kag paghalin sa kooperatiba.
Indi paman mahambal ni Carandang sa karun kun pila ang magaupod sa pagpirma sa amu nga petisyon.
Dugang pa ni Carandang nga posible ipaabot nila sa lokal nga gobyerno sang Capiz nga magpapasar sang resolusyon nga nagapamatok sa programa sang modernisasyon kapareho sang ginbuhat sang mga opisyal sa syudad sang Bacolod.
Samtang indi naman mag-upod ang mga jeepney operator sa Capiz sa tion nga mag protesta ukon mag-untat byahe ang mga kaupdanan sa metro Manila kay mas importante nga may ipauli sila nga kita sa tagsa ka pamilya.
