ROXAS CITY – Wala sang dapat kulbaan apang indi man magpakampante sa napagkit nga kaso sang African Swine Fever (ASF) sa Capiz, sa baylo, gilayon i-report sa otoridad ukon sa Barangay Kapitan ang gulpi nga pagkamatay ukon pagbalatian sang mga hinuptan nga baboy.
Ini ang ginpahayag ni Dr. Leonel Abordo, Provincial Veterinarian, sang mainterview sang Bombo Radyo.
Suno diri, alerto na sa karon ang mga kaiping nga kabanwahanan sang Maayon, kaangay sang Pilar, President Roxas kag Dao kun sa diin nagpahamtang ang mga ini sang kaugalingon nga border checkpoint.
Dugang pa ni Abordo nga padayon ang ila monitoring sa Barangay Canapian nga amu ang ginhalinan sang nasambit nga virus, kag ginsiling nga malaka na ang mga nagahupot sang baboy sa amu nga barangay kag wala naman sang may nagamasakit nga sapat.
Nahibaluan nga mahimo mapasa sang tawo ang ASF sa baboy kapareho kun nakatapak ang tawo sa tangkal nga may virus kag magapadulong sa isa naman ka tangkal nga may ginahuptan nga baboy.
Sa karon, wala na nadugangan ang numero sang mga baboy nga nagpositibo sa ASF, sa Capiz.
