ROXAS CITY – May yara na sang person of interest ang mga kapulisan sa pagsulod sang isa ka baligyaan sang feeds sa banwa sang Pontevedra.
Sa interview sang Bombo Radyo kay PMaj. Syril Punzalan, hepe sang Pontevedra Municipal Police, nga alas 10:20 kagab-i, Marso 3, ginsulod sang kawatan ang amo nga establisiyemento.
Sa imbestigasyon sang mga katapo sang Scene of the Crime Operation (SOCO), nga sa likod sang nasambit nga baligyaan ang nangin point of entry sang mga suspetsado.
Palaligban man suno sa hepe kun paano nabuksan ang vault bangud wala man sang nakit-an nga pagpamuwersa sa pagbukas sini.
Nahibaluan nga ang inisyal nga kantidad nga ginpahayag sang mga kapulisan ang P270k, apang sandig sa ila pagberipika, mas o menus P150,000 ang cash sa sulod sang vault nga nataban sang mga kawatan.
Kalakip naman sa paga-imbestigahan ang tatlo ka mga persona nga nakahibalo kun paano buksan ang amo nga vault.
Pagatutukan man sa karon sang mga kapulisan kun may kaangtanan bala ang ini nga insidente sa mga nauna nga kaso sang pagpangawat sa ila banwa.
Sa karon, padayon pa ang imbestigasyon sang mga otoridad.
