ROXAS CITY, CAPIZ- Nagapadayon ang pagpahamtang kag monitoring sang mga kapulisan sa tagsa ka mga buluthuan sa probinsya sang Capiz.
Sa interview sang Bombo Radyo kay Police Captain Merry Chris Dela Cruz, Police Information Officer sang Capiz Police Provincial Office, iya ginpahayag nga hugot gid nga ginabantayan sang mga kapulisan ang tagsa ka mga estudyante kag manunudlo sa mga eskwelahan.
Dugang pa sini, nagapatigayon ang ila nga hanay sang regular nga school visitation kag nagakoordinar sa tagsa ka mga
Principal ukon mga Guidance Counselor kag ginahinalaan ang may kaangtanan sa hulag sang tagsa ka mga estudyante agud masigurob nga wala sang kun ano nga insidente ang magluntad sa tagsa ka mga buluthuan.
Nahibaluan, nga sa subong nga bulan sang Agosto, pila ka mga serye sang mga kriminalidad ang natabo sa pila ka mga buluthuan sa pungsod sa diin ang tanan nga may mga kahimuan sang amo nga insidente mga estudyante.
Pagpasiguro naman ni Dela Cruz, wala pa sang may nabalhag nga may kasubong sini nga natabo sa probinsya, apang may yara sang mga estudyante nga matuod nagadala sang mga matalom nga butang kag batchikurno sa diin amo ang masami nila nga nagakakumpiskar.
Panawagan naman sini sa publiko, ilabi na sa mga ginikanan sang mga estudyante, nga i-tsekyar gid ang tagsa ka mga sulod sang bag sang mga kabataan agud masiguro nga wala ini sang kun ano nga malain nga butang nga mahimo makatuga sang kriminalidad sa eskwelahan.
In an interview with Bombo Sunnie Mae Constantino Batencila
