TAPAZ, CAPIZ- Nagpa-bombo ang mga kunsumidor sang Capiz Electric Cooperative Inc. Matapos nga natuntuhan sang isa ka meter reader sa Barangay Poblacion, Tapaz, Capiz.
Ang nasambit nga meter reader amo si alyas ‘Miguel’.
Sa interview sang Bombo Radyo kay Ms. Joan Glumalid, iya ginpahayag nga 17 sila tanan ang nabiktima sang nasambit nga meter reader nga nagpakin-kuno collector sang mga bayad sa bill sang kuryente.
Dugang pa sini, ginkakibot nila nga nakabaton sila sang Notive of Disconnection nagikan sa opisina sang Capiz Electric Cooperative Inc., kay bangud suno sa iya nagabayad man sila sang insakto sa ila nga balayran sa kuryente.
Bangud sa natabo, ginpatawag ini sila sang CAPELCO-Dumalag Branch agud nga papermahon sang Promisory Note may kaangtanan sa ila sini nga balayran sa bill kag didto nila nadiskubrehan nga si alyas ‘Miguel’ wala gina remit ang ginakolekta sini nga mga bayad nila kag wala na nagpakita pa sa opisina.
Samtang, sa kakalalip nila kay alyas ‘Miguel’, nakita ini ni sa facebook sa diin nga ila ini nga nakaistorya kag suno sa iya, nagpromisa ini nga ibalik ang kwarta nga gintaban sini apang tubtob sa karon wala pa sang may nagtupa.
Nahibaluan nga si Joan ang nataban sang kantidad nga nagabalor sang kapin P112,000, samtang yara naman sa P65,000, P48,000 kag mga magagmay pa nga kantidad sa pila pa ka mga biktima sa amo nga lugar.
Ginaalegar nga magluwas sa ila sini nga barangay, may yara man suno sang nabiktima si alyas ‘Miguel’ sa banwa sang Dumalag.
Sa karon, ginahulat nila nga mabalik sa ila ang kwarta nga ila ginpangbayad kag kun indi ini mabalik, desidido sila nga pasakaan sang kaso ang nagpakuno-kuno nga collector nga si alyas ‘Miguel’.
Interviewed by Bombo Francis Biñas
