CAPIZ – Nagapanawagan ang Department of Environment and Natural Resources (DENR) Capiz sa publiko nga indi magpang-utod sang puno sang kahoy bangud makabig ini nga iligal kun wala sang permit to cut kag permit to transfer.
Sa interview sang Bombo Radyo kay Mr. Ernest Federiso, DENR officer kag Officer-in-Charge sang Capiz Provincial Environment and Natural Resources Office (CaPENRO), iya ginpahayag nga sang Nobyembre 3, natigayon nila nga makumpiska ang 26 ka mga mahogany lumber nga nagabalor P16,840 samtang nakuha naman sa Ivisan, Capiz ang mga karga nga furniture sa topdown nga motorsiklo nga wala sang platenumber.
Sa pagpangusisa ni Federiso, wala sang permit nga dala ang driver kag ginrason sini nga nalipatan lang ang permit ukon delivery receipt.
Ginabanta P28,000 ang balor sang mga furniture.
Suno sa natungdan, nagligad nga tuig pa lang, aware na ang mga furniture shops nga dapat may yara sila sang mga permit ukon resibo nga ginapadala sa tion nga i-deliver ang gamit.
Pahayag niya, isa sa mga rason sang pagbaha amo ang pag-utod sang puno sang kahoy bangud wala na sang may nagasagang sa tubig ulan sa kabukiran ukon kagulangan.
Dugang pa sang natungdan, wala nagalab-ot sa P500 ang paggawad sang permit sa nasambit nga ahensya.
