Apektado ang mga manugpangisda sa syudad sang Roxas bangud man sa padayon nga pagsaka sang presyo sang gatong nga nagapabudlay sa ila pangabuhi.
Sa interview sang Bombo Radyo kay Ronilo Combate, chairman sang Roxas City Fisheries and Aquatic Resources Management Council (CFARMC), iya ginpahayag nga dako gid ang epekto sang pagmahal sang krudo sa mga magagmay nga manugpangisda bangud ginakinahanglan nila ini sa ila adlaw-adlaw nga pagpangisda.
Suno kay Combate, nagalab-ot sa apat ka litro sang krudo ang magamit sang isa ka bangka pakadto kag pabalik sa lawod.
Bangud sini, naganubo gid ang ila kita kada adlaw bangud indi man perme nga dako ang ila sini nga panguha .
Dugang pa niya kon magapadayon ang pagsaka sang presyo sang gatong, posible ang iban nga mga manugpangisda maga-untat na sa pagpalawod.
Nagalaum man ang natungdan nga mahatagan sang madasig nga aksyon kag nagakaigo nga solusyon sang gobyerno ang ila nga mga panawagan.
