ROXAS CITY – Natalana nga maga-baton sang tig-P5,000 nga financial assistance ang mga pamilya nga naapektuhan sa pagpanalasa ni bagyong Ursula sang Disyembre 25, 2019 sa banwa sang President Roxas.
Ini ang ginkumpirmar ni Mayor Receliste Escolin sang mainterview sang Bombo Radyo.
Suno kay Escolin, matuman na ang madugay nga promisa nga ayuda sa mga na bagyohan nagikan sa National Housing Authority (NHA) pinaagi sa LGU-President Roxas kag may alokasyon nga P47-M.
Paathag sini, na-atrasar ang nasambit nga ayuda sang pila ka tuig bangud sa paliwat-liwat nga realignment sang pondo sang NHA.
Apang sa karon, ginakalipay sang alkalde nga antes magtakup ang tuig 2023 mabaton na ini sang mga apektado ang bulig pinansyal.
Yara sa kapin 9,400 ka mga households ang magabaton sang ayuda.
Aminado si Escolin nga indi bastante ang nasambit nga pondo agud tululupod nga makabaton ang 10,500 ka households sa banwa apang nasiguro sini nga magatinguha pa gid siya agud madamo sang ayuda ang maga-abot sa President Roxas.
