ROXAS CITY- Nagapanawagan karon ang mga nabiktima sang panibag-o naman nga investment scam sa probinsiya sang Capiz sa suspek nga si Angene Dapulano nga kun mahimo magpakita na ini kag atubangon ang mga investors nga nagsalig sa iya sang daku nga kantidad sang kwarta.
Suno sa wala na nagpakilala nga biktima nga abyan man ni Dapulano, luyag kuntani nila nga magpakita na lamang ang suspek bangud bukas man sila agud magpakighinala diri.
Luyag lamang sang biktima nga mapaathag ni Dapulano kun ano ang natabo sa ila nga kwarta.
Desidido ang biktima nga magpasaka sang kaso apang nagapangita sila sang abogado nga magahatag kuntani sang libre nga serbisyo sa ila agud indi na sila magastusan pa.
Ginaganyat naman sang biktima ang iban nga mga natuntuhan ni Dapulano nga magpakita agud makahimo sila sang nagakaigo nga tikang batuk sa suspek.
