ROXAS CITY– Hugot nga ginsiling sang Punong Barangay sang Barangay Punta Tabuc, Roxas City nga mga pangayaw ang tanan nga nagkaladakpan sa ginpatigayon nga drug buybust operation sang mga otoridad.
Sa interview sang Bombo Radyo kay Punong Barangay Nestor Buenviaje, iya ginpahayag nga madamo sang mga pangayaw sa ila barangay ang gadakpan sa mga buybust operation.
Dugang pa sini, sa gihapon may yara sang gina-monitor ang mga otoridad kag mismo ang mga opisyal sa BADAC Watchlist sa ila barangay apang indi tam-an ka damo.
Pahayag pa sini, bangud nga kaangay bukas gid ang Barangay Punta Tabuc, madamo sang mga pangayaw ang nagaguha-sulod rason nga kun kaisa, ang ngalan sang barangay ang nagakadalasa sa mga pangayaw nga nagabuhat sang mga iligal nga aktibidad.
Nahibaluan nga pag-abot sa seguridad, magluwas sa mga tanod may yara man sang mga kapulisan ang naga-monitor sa palibot apang suno kay Kap. Buenviaje, indi gid matatapan mayad ang mga indibidwal nga nagahimo sang iligal bangud nga kaangay ang hulag lang man sang mga otoridad ang ginabantayan sang amo nga mga indibidwal.
Samtang, panugyan naman ni Buenviaje, indi lamang sa iya sini nga mga nasakpan kundi mismo sa mga pangayaw nga kun mahimo untaton na ang amo nga pagpatigayon sang iligal nga mga aktibidad para sa mas malinong kag matawhay nga palibot.
