ROXAS CITY – Nagdangat na sa masobra 5, 000 ang nakapauli nga mga Locally Stranded Individuals (LSI’s) sa probinsiya sang Capiz.
Ini ang ginkompirmar ni Provincial Disaster Risk Reduction and Management Office (PDRRMO) Head Judy Grace Pelaez sang mainterview sang Bombo Radyo.
Suno kay Pelaez nagdangat na sa 5, 164 ka mga LSI’s na ang nakapauli sa probinsiya kag nagalab-ot naman sa 1, 364 ang nakapauli nga mga Returning Overseas Filipinos (ROF’s).
Ginkompirmar man ni Pelaez nga dugang nga 78 ka mga Locally Stranded Individuals (LSI’s) ang magaabot sa probinsiya sang Capiz subong nga adlaw, Hulyo 28.
Sa interview sang Bombo Radyo, ginpahayag ni Pelaez nga ginsugat sa Iloilo ang amo nga mga indibidwal nga nakapauli pinaagi sa Hatid-Tulong program sang gobyerno-nasyunal.
Gilayon nga pagadal-on ang amo nga indibidwal sa mga quarantine facilities sang ila mga kabanwahanan kag magapaidalom sa 14-day quarantine period kag ipaidalom sa real-time polymerase chain reaction (RT-PCR) tests.
Ginpahayag ni Pelaez nga antes makapauli sa probinsiya, ginpaidalom naman sa rapid tests ang nasambit nga mga indibidwal.
Ginpanindugan sini nga may yara sang koordinasyon sa mga local government units (LGU’s) ang pagpapauli sang mga LSI’s.
Ginpahayag pa sini nga indi man mahimo nga balibaran sang mga LGU’s ang nagapauli nga mga LSI’s bangud mandatu sang gobyerno-nasyunal ang pagpapauli sa mga stranded nga mga indibidwal sa Metro Manila sa ila mga kaprobinsiyahanan.
Ginkompirmar man ni Pelaez nga naghinyo si Capiz Governor Esteban Evan ‘Nonoy’ Contreras kanday Aklan Governor Florencio Miraflores kag Iloilo Governor Arthur Defensor, Jr. nga ipaiway ang pagbaton sang mga LSI’s nga mga Capizeño nga magaagi sa ila mga puerto kag pahugpaan.
Ini agud makontrolar ang mga nagapauli nga mga Capizeño kun sa diin dapat sa Roxas City gid lamang sila magaagi nga may koordinasyon sa gobyerno.
